ReMake Electric þróar, framleiðir og markaðssetur eTactica orkueftirlitskerfið sem er einstakt í sinni röð í heiminum. Kerfið gerir fyrirtækjum mögulegt að fylgjast með kostnaði, álagi og notkun rafmagns niður á hvert öryggi með það að markmið að auka rekstraröryggi og ná fram skilvirkni og hagræðingu í rekstri.

Að sögn Hilmis Inga Jónssonar, forstjóra og stofnanda Remake Electric er fyrirtækið að vonum ánægt með samstarfssamninginn: „Við sjáum mikil tækifæri í sölu á eTactica orkueftirlitskerfinu í Bretlandi. Með kerfinu geta fyrirtæki af öllum stærðum náð betri stjórn á orkunotkun sinni og gripið til aðgerða til að draga úr óskilvirkni í rekstri, “segir Matt Davies, framkvæmdastjóri viðskiptaþróunar hjá  InTouch. „Eftirlit og stjórnun á nýtingu orku er orðin mikilvægur þáttur í rekstri fyrirtækja í Evrópu í dag og fyrirtækjum er beinlínis skylt að draga úr orkunotkun sinni og þar með losun á koltvísýringi. eTactica kerfið veitir stjórnendum þá yfirsýn sem þeir þurfa til að mæta þessum kröfum sem dregur úr líkum á því að fyrirtækin þurfi að greiða viðurlög eða sektir þegar fram í sækir.“

ReMake Electric hefur tekist afar vel að kynna eTactica orkueftirlitskerfið fyrir leiðandi aðilum á mörkuðum erlendis. ReMake var meðal annars með sýningarbás á einni stærstu tæknisýningu í heimi, Hannover Messe, fyrr í mánuðinum og vakti þar mikla athygli. Leiðandi aðilar í framleiðslu rafmagnsbúnaðar sýndu orkueftirlitskerfinu mikinn áhuga og þegar hafa á þriðja tug aðila óskað eftir því að koma á samstarfi um sölu á kerfinu á Norðurlöndum, Evrópu, Bandaríkjunum, Suður-Afríku og víðar.

„Við sjáum fram á spennandi tækifæri á mörkuðum erlendis þar sem eTactica er auðvelt í uppsetningu og sveigjanlegt í notkun. Við erum bjartsýn á framtíðina og verðum á næstu vikum komin á markað með vörur okkar frá Svíþjóð til Singapore, “ segir Hilmir Ingi.

Við óskum Remake Electric teyminu innilega til hamingju með þennan flotta áfanga!

Kristján Freyr Kristjánsson, áður framkvæmdastjóri Innovit er nýr framkvæmdastjóri sameinaðs félags. Við sameininguna mun nýtt eignarhaldsfélag, Klak Innovit ehf. líta dagsins ljós. Eigendur Innovit ehf. eignast 60% heildar hlutafjár í sameinuðu félagi og eigendur Klak ehf. 40% hlutafjár. Hið sameinaða félag verður í eigu Háskóla Íslands, Háskólans í Reykjavík, Nýsköpunarsjóðs Atvinnulífsins, Samtaka iðnaðarins, áður eigenda Innovit ehf., og Nýherja, áður eiganda Klak ehf. Auk þess munu stofnaðilar Innovit áfram eiga hlut.

Starfsfólk beggja félaga munu nú starfa saman undir einum hatti en auk þeirra koma yfir 100 leiðbeinendur og fjárfestar úr íslensku atvinnulífi að ýmsum verkefnum tengdum félaginu. Stjórn félagsins skipa Þorsteinn G. Gunnarsson, stjórnarformaður Klak Innovit, Þórður Sverrisson, forstjóri Nýherja, Ari Kristinn Jónsson, rektor HR, Halldór Jónsson, sviðsstjóri Vísindasviðs HÍ, Helga Valfells, framkvæmdastjóri NSA, Halla Helgadóttir, framkvæmdastjóri Hönnunarmiðstöðvar og Magnús Már Einarsson, fyrrum meðstofnandi Innovit.

Saman hafa Innovit og Klak staðið að Startup Reykjavik viðskiptahraðalinum í samstarfi við Arion banka þar sem 10 fyrirtæki í senn fá 2.000.000 kr. í hlutafé, 10 vikna þjálfun frá yfir 50 sérfræðingum og tækifæri til þess að kynna fyrir fjárfestum. Á meðal annarra verkefna á vegum Innovit eru Gulleggið frumkvöðlakeppni sem hefur tekið á móti og stutt við yfir 1000 viðskiptahugmyndir og Atvinnu- og nýsköpunarhelgar (e. Startup Weekend) sem hafa farið fram í átta sveitarfélögum um land allt og hafa aðstendur sömuleiðis stjórnað slíkum helgum í Álaborg í Danmörku og Tehran í Íran. Þá er Innovit jafnframt íslenskur umsjónaraðili Alþjóðlegrar athafnaviku sem fer fram í yfir 120 löndum. Á meðal verkefna Klak má t.d. nefna Viðskiptasmiðjuna þar sem um 200 námskeið hafa verið kennd frá árinu 2008. Einnig hafa verið haldin Seed Forum Iceland sprotaþing undanfarin fimm ár á vegum Klaks og fyrirlestraröðin Nýsköpunarhádegi undanfarna tvo vetur. Þá hafa bæði félögin boðið frumkvöðlum og sprotafyrirtækjum vinnuaðstöðu í frumkvöðlasetrum.

Hugmynd að sæng úr íslenskri ull þótti besta viðskiptahugmyndin á Atvinnu- og nýsköpunarhelginni sem fram fór nýliðna helgi á Akureyri. Hugmyndin er hugarfóstur Önnu Þóru Ísfold sem hannar undir merkjum Isfold.

Að sögn Önnu Þóru eru sængur úr íslenskri ull mjög gott útflutningstækifæri. Íslenska ullin sé þeim eiginleikum gædd að hún haldi vel hita og hleypi raka frá sér. Þessir eiginleikar henti vel til sængurgerðar:

„Eiginleikar vörunnar eru helst þeir að þér verður heitt nánast samstundis án þess að ofhitna. Ullarsæng jafnar hitastig líkamans og hleypir út raka með náttúrulegum hætti. Þá hafa rannsóknir sýnt fram á að gigtveikir nái lengri draumsvefni með ullarsæng“

Ísland spilar meginhlutverk í allri hönnun og markaðssetningu vörunnar:

„Menningarlegur arfur íslensku sauðkindarinnar gegnir lykilhlutverki í hönnun og textagerð vörum Isfold. Þá mun tenging við íslenskan menningararf og þjóðsögur setja punktinn yfir i-ið þegar kemur að markaðssetningu, bæði erlendis sem og hér heima.“

Uppskera helgarinnar kom Önnu Þóru skemmtilega á óvart. Það sem situr eftir er trú fólks á vöruna og möguleika hennar til árangurs hér á landi og erlendis. Þátttaka á Atvinnu- og nýsköpunarhelgi er að hennar sögn frábært veganesti í áframhaldandi vinnu við undirbúning og stofnun Isfold

Atvinnu- og nýsköpunarhelgi á Akureyri fór fram í samstarfi við Akureyrarstofu, Tækifæri fjárfestingasjóð, Stefnu Hugbúnaðarhús og Háskólann á Akureyri. Eins studdi fjöldi fyrirtækja og einstaklinga við viðburðinn með margvíslegum hætti.

Innovit nýsköpunar- og frumkvöðlasetur og Landsbankinn hafa undanfarna tvo vetur staðið fyrir Atvinnu- og nýsköpunarhelgum í samstarfi við sveitarfélög um land allt. Markmið helganna er að virkja fólk til athafna og skapa vettvang fyrir þá sem langar að koma viðskiptahugmynd í framkvæmd og njóta leiðsagnar á því sviði. Áður hafa Atvinnu- og nýsköpunarhelgar farið fram á Suðurnesjum, Hornafirði, Reykjavík, Akranesi, Fjarðabyggð og Ísafirði.

Um er að ræða síðasta viðburðinn í vetur og hafa þessar helgar heppnast vonum framar, þátttakendur telja á fimmta hundrað og fjölmargar viðskiptahugmyndir hafa tekið sín fyrstu skref á viðburðunum.

Þetta er í þriðja sinn sem Atvinnu- og nýsköpunarhelgin fer fram á Akureyri en 2011 og 2012 fóru slíkar helgar fram við frábærar viðtökur bæjarbúa. Ljóst er að mörg tækifæri til nýsköpunar leynast í bæjarfélaginu og mikill vilji er meðal bæjarbúa til þess að efla atvinnulífið og auka fjölbreytileika starfa. Margar áhugaverðar hugmyndir hafa komið þar fram, þar á meðal hugmyndin um Tannstrá (www.tannstra.is) sem kynnt var fyrir rúmu ári síðan og er nú komin í framleiðslu og sölu. Hugmyndin er hugarfóstur Snæfríðar Ingadóttir en tannstráin eru tannstönglar gerðir úr íslenskum stráum. Hugmyndin vann til þriðju verðlauna á Atvinnu- og nýsköpunarhelginni á Akureyri 2012.

Atvinnu- og nýsköpunarhelgar eru að erlendri fyrirmynd, en „Startup weekend“, hafa farið sigurför um allan heim. Hér á Íslandi hafa slíkar helgar verið haldnar víða um land undanfarin ár með góðum árangri. Hátt í 500 manns hafa fram til þessa sótt viðburðina og stigið þar sín fyrstu skref að stofnun fyrirtækja. Markmið helganna er að virkja fólk til athafna og standa viðburðirnir yfir frá föstudegi til sunnudags þar sem  þátttakendur fá tækifæri til að vinna að hugmyndum sínum og njóta leiðsagnar og innblásturs frá sérfróðum aðilum.

Viðburðurinn er öllum opinn og það kostar ekkert að taka þátt. Yfir helgina fá þátttakendur tækifæri til þess að ná lengra með hugmyndir sínar með aðstoð fjölmargra sérfræðinga. Eins verða flutt gagnleg erindi um uppbyggingu hugmynda og stofnun fyrirtækja. Viðburðurinn er því fyrir alla þá sem hafa hugmyndir að vöru eða þjónustu, starfandi fyrirtæki og einnig þá sem langar að aðstoða aðra við uppbyggingu hugmynda.

Innovit og Landsbankinn standa að viðburðinum í samstarfi við Akureyrarstofu, Tækifæri fjárfestingasjóð, Stefnu hugbúnaðarhús og Háskólann á Akureyri. Eins styður fjöldi fyrirtækja og einstaklinga við viðburðinn með margvíslegum hætti. Viðburðurinn fer fram í Háskólanum á Akureyri.

Frekari upplýsingar um viðburðinn og skráningu má finna á www.anh.is

Dagana 5. til 7. apríl næstkomandi fer fram Atvinnu- og nýsköpunarhelgi á Akureyri. Þetta er í þriðja sinn sem slík helgi fer fram í bæjarfélaginu en árið 2011 og 2012 fóru fram slíkir viðburðir með mjög góðum árangri. Það eru Innovit og Landsbankinn sem standa að viðburðinum í samstarfi við Akureyrarbæ. Eins styður fjöldi einstaklinga og fyrirtækja við viðburðinn með margvíslegum hætti. Við hvetjum alla áhugasama um stofnun fyrirtækja og uppbyggingu viðskiptahugmynda um að skrá sig og taka þátt í helginni með okkur.

Viðburðurinn fer fram í Háskólanum á Akureyri, þátttaka er ókeypis og allir geta tekið þátt. Nánari upplýsingar má finna á www.anh.is

Startup Weekend fer þannig fram að á föstudagskvöldi mæta hugmyndasmiðir og kynna sínar hugmyndir fyrir öðrum þátttakendum og reyna að mynda teymi til að vinna að sinni hugmynd. Teymin sem myndast vinna svo að hugmynd það sem eftir lifir helgarinnar en markmiðið er að ná að komast eins langt með framkvæmd hugmyndarinnar og mögulegt er.

Undir lok SWRVK helgarinnar kynntu 14 teymi hugmyndir sínar frammi fyrir dómnefnd sem valdi úr bestu hugmyndirnar. Dómnefndina skipuðu Dr. Ari Kristinn Jónsson rektor HR, Margrét Ormslev Ásgeirsdóttir frá Landsbankanum og Stefán Jökull Stefánsson frá frumkvöðlafyrirtækinu DCG ehf.

Úrslit urðu  sem hér segir:

1. sæti: „Lokunin“ er fyrirtæki sem mun selja bandvídd á niðurhali af netinu mun ódýrar en boðið er upp á í dag. Fyrirtækið nýtir tækni sem byggir á að nota bandvídd gagnavera sem almennt er ekki nýtt í þeim tilgangi að niðurhala efni erlendisfrá fyrir heimili. Gagnaver bjóða bandvídd á lágu verði og með því að nýta lausn Lokunarinnar þá er hægt að bjóða heimilum niðurhal á mun lægra verði en almennt gerist á markaðnum í dag. Lokunin fékk 200.000 kr. frá DCG ehf. í fyrstu verðlaun.

2. sæti: „Broddur“ er vaxtaræktardrykkur unnin úr hinni hefðbundnu broddmjólk sem er fyrsta mjólkin sem kýr framleiðir eftir kálfburð. Hugmyndin Broddur fæddist á Startup Weekend Reykjavík en teymið vann í kjölfarið markaðsrannsókn, samdi við kúabændur um birgðir, setti upp heimasíðu og Facebook síðu og náði áður en helgin var úti að selja yfir 10 lítra í gegnum pöntunarkerfi Brodds á heimasíðunni www.abroddinn.is

3. sæti: „Healing Nature“ er hugmynd sem gengur út á að bjóða ferðamönnum upp á nudd og yogatíma á hálendinu. Hugmyndin er að nota mongólskt hringtjald sem auðvelt er að færa á milli staða. Healing Nature hefur fengið góðar viðtökur frá aðilum innan ferðaþjónustunnar sem kallað hefur eftir nýjungum í ferðamennsku. www.relax.is

Startup Weekend má segja að sé alþjóðlegt net sambærilegra viðburða sem eiga sér stað út um allan heim, allt árið um kring. Á hverjum stað fyrir sig taka heimamenn að sér skipulagningu viðburðarins s.s. varðandi húsnæði, auglýsingar, mentora, fyrirlesara, dómnefnd, mat, drykk o.fl. en stjórnandi viðburðarins hverju sinni kemur erlendis frá. Stjórnandi Startup Weekend Reykjavík, Alistair Shepherd kemur frá Startup Weekend Europe en hann er þaulreyndur í stofnun fyrirtækja og frumkvöðlastarfi.

Sprotafyrirtækið SARdrones sigraði í frumkvöðlakeppni Innovit um Gulleggið 2013. SARdrones er ómannað leitarloftfar og hugbúnaður til aðstoðar við leit og björgun.

Lausninni er ætlað að aðstoða björgunarsveitir við störf sín og gera þeim kleift að fljúga leitarloftfari yfir afmörkuð leitarsvæði og safna gögnum til greiningar. Að baki hugmyndinni standa Hjörtur Geir Björnsson og Skúli Freyr Hinriksson, nemendur á lokaári í verkfræði við Háskóla Íslands, Björn Geir Leifsson skurðlæknir, Guðbrandur Örn Arnarson viðskiptafræðingur og Ólafur Jón Jónsson forritari en Guðbrandur og Ólafur eru jafnframt reyndir björgunarsveitarmenn.

Teymið vinnur nú að frumgerð lausnarinnar og markaðssetningu á alþjóðlegum vettvangi. Katrín Jakobsdóttir, mennta- og menningarmálaráðherra, afhenti sigurverðlaunin við hátíðlega athöfn í Háskólanum í Reykjavík í gær, að því er fram kemur í fréttatilkynningu.

Í öðru sæti var sprotafyrirtækið Intraz með lausn sem greinir ferli neytenda og kauphegðun þeirra til markvissrar veltuaukandi hagræðingar í smásöluverslun.

Í þriðja sæti var sprotafyrirtækið Sigurást sem hannar fatnað fyrir fyrirbura sem dvelja á nýburagjörgæslu.

Alls námu heildarverðlaun Gulleggsins um 3 milljónum króna. Auk verðlaunafjár frá Landsbankanum veittu styrktaraðilar keppninnar aukaverðlaun til viðskiptahugmynda úr úrslitahópnum. Marel veitir viðskiptahugmyndinni Silverbergráðgjöf við hönnun og smíði frumgerða, KPMG veitir viðskiptahugmyndinni geoSilica ráðgjafatíma hjá fyrirtækinu, Íslandsstofa veitir viðskiptahugmyndinni Betri Svefnþátttöku í ÚH verkefni Íslandsstofu og Advel Lögmenn veitir SARdronesráðgjafatíma hjá fyrirtækinu. Þá vann SARdrones einnig til verðlauna í símakosningu NOVA fyrir skemmtilegustu kynninguna á lokahófi keppninnar.

Hér fyrir neðan er stutt lýsing á hugmyndunum tíu (í stafrófsröð);

Betri svefn
Svefnmeðferð í gegnum internetið.

geoSilica
Vöruþróun og markaðssetning á hágæða fæðubótarefni unnið úr jarðhitakísli úr affallsvatni jarðvarmavirkjanna.

Intraz
Sjálfvirk greining á ferli neytenda og kauphegðun þeirra til markvissrar veltuaukandi hagræðingar í smásöluverslun.

Heyr Heyr
Veröld Stirnis gengur út á að kenna börnum að veita hugmyndum sínum athygli á meðan þau skemmta sér í ævintýralegri afþreyingarveröld.

Murk Games
Parallel Pursuit er fyrsti íslenski eSports leikurinn ætlaður fyrir erlendan markað.

SARdrones
Þróun á ómönnuðum leitarloftförum og hugbúnaði til aðstoðar við leit og björgun.

Sigurást
Sérhannaður fatnaður fyrir fyrirbura sem dvelja á nýburagjörgæslum.

Silverberg
Skrásetning og niðurstöður afreka þinna í líkamsrækt, aðgengilegt allsstaðar án fyrirhafnar.

Sport Hero
Í Sport Hero upplifa börn sig sem sínar eigin íþróttahetjur og um leið eignast ógleymanlegar minningar um íþróttaferil sinn.

Verkvaki
Verkvaki er hugbúnaður sem á nýstárlegan hátt nýtir nýjustu tækni við verkumsjón og tímaskráningar.

Startup Weekend er alþjóðlegur viðburður sem hefur farið sigurför um heiminn. Markmið viðburðarins er að byggja upp viðskiptahugmyndir á 54 klukkustundum.

Þátttakendur mæta á staðinn, með eða án hugmyndar og fá innblástur og leiðsögn við að byggja upp viðskiptahugmynd sem í framtíðinni gæti orðið að fullvaxta fyrirtæki. Hinn þaulreyndi Alistair Shepherd frá Startup Weekend Europe mun leiða starfið yfir helgina en hannhefur staðið fyrir sambærilegum viðburðum út um allan heim.

Öllum er frjálst að taka þátt en þar koma saman einstaklingar með ólíka menntun og bakgrunn, einna helst tæknimenntaðir, viðskiptafræðingar, grafískir hönnuðir og frumkvöðlar.

Hvað er innifalið?

-Hjálpsamir og reynslumiklir mentorar
-Leiðsögn og kennsla á tól og tæki sem nýtast við stofnun fyrirtækja
-Gagnlegir fyrirlestrar
-Verðlaun fyrir bestu hugmyndina
-Matur allan tímann (morgun-, hádegis- og kvöldmatur og snarl á milli)
-Drykkir allan tímann (gos, kaffi, orkudrykkir)

Taktu af skarið og skapaðu eigin framtíð!

Dagskrá og nánari upplýsingar má nálgast á www.iceland.startupweekend.org og www.startupweekend.org.

Skráning fer fram hér: http://www.signupgenius.com/go/70A0E4AA5AE23A31-registration